Egunak pilatuz doaz amaierarik gabeko itsaso
honetan, eta nik, E. Galeanoren utopien moduan egiten dut aurrera: zerumugara
inoiz iritsiko ez garela jakin arren, aurrera egitearen ilusio soilaz. Halakoak
baitira utopiak eta ametsak, ukitzen zailak, zehazten zailagoak eta konplitzen
ezinezkoak.
Baina hala egiten dut aurrera, auskalo zeren
bila lur exotiko urrunetara. Ez dakit ondo zergatik edo zertara, eta noiz eta
norekin galdetzea alferrik da. Nire ipurdia belaontzi batean eserita dudalaz
baino ez nago ziur eta erantzunak bilatu ordez, galderak pilatzen ditudanetik,
bidaia honen helmuga noiz eta non izango den ere ez dakit. Baina horretan datza
bidaiatzearen xarma, ziurtasunez ahaztu eta enigmen munduan bidea egitean.
Kontua ez baita norabait iristea, bideak ematen duen plazer eta aukerez
gozatzea baizik.
Hala erabaki dut, ahal dudan bitartean
behintzat, hegazkinik ez hartzea, garestia eta kutsakorra izateaz gain, bidea
bera egitearen plazerrik ematen ez duelako. Ez dakit baina, eta galderak
pilatuz eta pilatuz doaz, airez bidaiatzeari uko egitea, oinak lurrean
edukitzeko izango den!
No hay comentarios:
Publicar un comentario