Ustekabean hasi da dena. Ezer gutxi pentsatu
eta gutxiago antolatuta ikusten dut nire burua Algeciraseko portuan, bizkarrean
motxila eta eskuartean txirrinda dudala. Atzean uzten ditut hogei orduko
autobus bidaia, bukatu gabeko mila lan eta agurtu ez ditudan hainbat lagun.
Aurrean, oraindik ez dakit zer dudan. Oraingoz behintzat, buruan daukadan plan
bakarra txirrinda hartu eta 40km-ra dagoen Gibraltarreraino iristea da, han
bait daukat hitzordua duela astebete interneteko foro batean ezagututako
belaontzi baten kapitainarekin.
Aduana pasa eta britainiar hirira sartzeko
aireportuaren pista zeharkatuta, segituan aurkitzen ditut moila eta ondorengo
asteetan etxea izatea espero dudan belaontzia. Barruan daude Robert kapitaina
(Brasil), Francesco (Italia) eta Robert (Herbehereak). Biharamunean gara
abiatzekoak.
Berehala argi gelditzen dira bakoitzaren
rolak: kapitaina kapitain da eta berak agintzen du hemen. Hemendik aurrera diziplina
eta obedientzia praktikatu beharko! Amarrak askatu eta haizearen esperoan,
motorrez egiten ditugu lehen orduak. Tarifaren parera iristerakoan, hegoaldera
jotzen dugu, ilundu baino lehen, ontzi erraldoiek gurutzatzen duten Gibraltargo
itsasartea lehen bait lehen zeharkatzeko. Iluntzerako Marokoko kostaldean gara,
galderaz beteriko abentura honen hasieran.
Afaldu eta segituan, ipar-ekialdeko haize bufada
hasi da. Kapitainak aparatu elektronikoen (radarra, AIS, GPS, irratia, pilotu
automatikoa…) funtzionamendua azaldu eta gaueko txandak banatzen ditu: bi ordu guardian
eta bi lotan, beti ere beste baten laguntzarekin. Nekeak-neke, ederra da gaua:
15 korapiloko popako haizea, milaka izar zeru oskarbian eta motorrik gabe
nabigatzearen lasaitasuna. Ezin ezer hoberik espero lehen gau honetarako.
Egunsentian haizeak behera egiten du,
arrantzan egiteko aukera emanez eta hasiberriaren suerteagatik edo, bazkaltzeko
prestatuko dudan atun (atunidoa behintzat) koxkor bat segituan harrapatzen dut.
Eguraldi onak eta haize lasaiak, irakurri eta idazteko denbora ere ematen dute.
Ai, bizitza egunero horrelakoa balitz!!
Goizaldean gara Casablancara iristekoak eta
gaua ere lasaia izango dela ematen du: haizerik gabe, oihalak jaitsi eta pilotu
automatikoaren laguntzaz ordu beteko txandak egingo ditugu bakarka, hiru orduko
loaldi luzeak egin ahal izateko. Goiz-partean baino, oihuek esnatzen naute eta begiak
irekitzeko denborarik gabe, kantzontziloetan agertzen naiz kubiertan. Argirik
gabeko sare batean gelditu gara harrapatuta! Ez da baino, labain on batek konpondu ezin
dezakeen ezer!
Aparteko arazorik gabe iritsik gara portura.
Dutxa eder bat eta siesta ederrago bat botatzeko ordua da. Gabon denoi eta izan
untsa!
Ondo, ondo! Beste bidai bat kapituluka irakurtzeko lantokiko bulegotik (Zendo)
ResponderEliminarBa ahalik eta denbora gehienez entretenitzen saiatuko naiz!!! Besarkada bat eta ikusi arte!!
ResponderEliminar